Райондиъ гIелимар ппара вея

авторы:Байрамова Сагибат Р. 

1940-пе исари хье  райондиъ хуру инсанар адавуйи пас хьасе. Макхьтабариъ дарсар ес гьикаи мич  Iуьрусаттиас,  хIа  шагьурариас мегIелимар, са чIалалди, хуру  инсанар.  Хуппай 1950-пе исари бицIи-цIуьри сад-Iуд хурас  аркьай хьуне,  хьасра бицIи училищабириъ. Хабди исалас иса жигьилар вей хьуне хурас шагьурариди хIа вузариди. Те  вахттари учIасра  рехIет и,  экзаменаракехIей  ицIандавуи.  Миштти  вахттар кетвей райондиъ завал хьуне са  хубжи хуруттар- мегIелимар, духтурар,  сае курар аркьаттар.

Хьал  магьме  ахиран  юцIу – цIегIуьфу исан  арайиъ хураттар Iаи пара хьуная, хуравусариъ учIасра  Iаи читтин  хьуная,  ацIуна пулар канве учIагуна.

Гьамиштти четинди ичира, хье дагьарари дуламиш вея  инсанаригI  ацIуна  хIа келлабур хъая  инсанар гIая,  ппараттарикес хуру гIелимар хьуная,  профессорар, академикар,  докторар наукабрин. АцIуна инсанар агъулар хIа курарил алдея, хье  республикайиъра сасра Российин шагьурариъра.

Кьандисуман газитариди  аттархьунауи  Фейзуллаев  Фейзулагьакес доктор наук хьуне пуна. Ми защищат акьуне хIуппарихъас диссертаци, кара  аркьая ми  Москвайиъ.  Биологин наукайин кандидатар хье райондиас Людмила Фейзуллаевна Мазанаевана  Магомедов Зейналабид Зайфирович э. Мазанаев  Шабан   Абдулкадирович э доктор филологических наук, профессор.  Махмудова Такибатна Гасаев Джамалудин – кандидатар медицинайин  наукайин. КIвал акьучин хъара ахьасе хье райондиъ мишттин гIелимар.

Магьа ушу хIефтайиъ хье районин центрайиъ хьуне  встреча  Гехъуьнарин хIуриас  профессор, академик,  обществайинна  техникайин  наукайин доктор  Тарланова Замир  Курбановичахъай. Гин кIиркIра Евгений Тарланов, хьира  профессорар э.  Са  хулаъ хьибу профессор ая. Ме  встречайихъас хье райониъ адихьая  газитиъра  ликIинауйи.

Встреча  кIвьал  акьуфра хье райондин хIатти  Ю. Исмаилова э  профессор,  академик,  доктор  Замир  Тарлановас Госпреми Дагъустандиас йинахIела.

Ме  встречайиъ ацIуна инсанар гъургъуне Замиран, гин хизанарин хIа гаф  аркьай,  фиштти четинди дадра  адавай сатти баба ухIуфичин якьу  шинуькв, фиштинттар гебирикес кеттархьунайчин. Фидегьен батIарди хъитIунауи Гехъуьнарин хIурин мегIелимди  БазукIай Рамазанова Тарланов Замирас  чIалар.

Магьа ме чIалар:

 

 

Суван  хIаре вун  хуруфе,

ШиникваIл ве  четин хьуфе.

Алчархьуне те дегIвин вахтт

Халкь-махлукьат  хьуни бед-бахт

 

 

ДегIвиас  ве дайина дар

Iэжиз бавас хьуни дардар

Бавас якьу шиникв ухIас

Алчархьуни  Iуьш-ягъ лихас

 

 

Мактаб ве иркIурас хуш хьуф,

Iурус чIал вас  бегелмиш хьуф,

Ве  зигьимдил хьуни бав  шад

Гьер дарсуни уй вас « ифаIд»

 

 

Замир Курбанович, ппара

Акьуни вун хурас чара

Адавари  хили кьимат

Дивуни вун  ппара зехIмат

 

 

Замир Курбанович, ве  ттур

Дербендира хьуни мехIшур

ДГУ-йин ире диплом

Гъушуф  хьуни  час вун мегIлум

 

Хавди хьуне вакес Iэлим-

МегIелимарин мегIелим

Агъул гадайи Iуьрус чIал

МихIтал хьуни кихьуф чин вал

 

 

ХIекь  гIилимдин рекъ фацIуна,

ЗехIмат дивуна ацIуна,

Гъушунай вун багьа ттурар-

Профессорар,  докторар

 

 

Аркьа фикир э ве дарин,

Гъургъа мез час э ве ширин

ХIекь гIелимдин алде  вал кIил

Чин-Агъулар э вал бахил

 

 

ВУЗди вун ицIан дарсарин,

Китабик  ликIен гафарин

Фадава чав сайинна сан

Ишира час э вун масан

 

 

Замир Курбанович, сагъул!

Яшамиш хьурай хье Агъул!

Агалкьунар  ппара  хьурай,

Вун сумантар хъара хьурай!